Chiquino

- ¡Ay, chiquino, a la era a jugá!. Te decía, que macordaba cuando er Jaime pasaba pa'l campo, me se caían los palos del sombrajo cada vez que lo veía tirá pallá, entremientras que hacía como que estrujaba la ropa en el pilón. Me barruntaba vení a trote er curazó, como la mula'l Toño toas las mañanas con los cántaros de la leche..
- Pero Cami, tu tié que vé que'r Jaime é de mu güena familia, aunque él sea asín desamanera tan humirde.
- Como si los jierros me se clavasen cuando la Jacinta lo mira y se le va descocá toa, y sin vergüenza ni pudó, que ya me gustaría a mí no tenel-lo, pa poderme acercá una mijina, aunque sólo sea pa olel-lo.
- Cami... Mía que la Jacinta é hermosa, la niña bonita'l pueblo.
- Ni Cami ni ocho cuartos. Er Jaime las tié a toas comiendo en su mano, pero te viá decí que pa jembras las de mi casta, y asín me quee'n el camino, esta jembra, y sus canne van a sé pa'r Jaime.
- Míalo, pallí va, to tan macho y tan bien parecío.
- Déhate que tié dueña...
- Ay, Cami, que no estoy pa que te enfade.
- Te digo yo que la Jacinta se quita sayas y se queda en ná, que la canne é la que se ve y no la que se esconde y que la Jacinta se adorna má que las mulas en romería.
- Mujé, canne tiene.
- Menos de lo que paece, que los tié a tós engañaos.
- Güeno, pos a vé qué me cuentas mañana, y cuidao, que los grajos no duermen.
- La Jacinta é el grajo má adonnao que he visto yo sin sé romería. ¡Chiquino! Enga ya de güerta, que é la hora de jalá.